ಶಿವಳ್ಳಿ: ಅಭಿವೃದ್ಧಿಯ ಹೆಸರಿನಲ್ಲಿ ಸ್ಥಾಪಿಸಲು ಉದ್ದೇಶಿಸಲಾಗಿದ್ದ ಬಯೋಗ್ಯಾಸ್ ಘಟಕದ ವಿರುದ್ಧ ಶಿವಳ್ಳಿ ಗ್ರಾಮಸ್ಥರು ನಡೆಸುತ್ತಿದ್ದ ಹಸಿರು ಹೋರಾಟಕ್ಕೆ ಕೊನೆಗೂ ಜಯ ಸಿಕ್ಕಿದೆ. ತಮ್ಮ ನೆಲ, ಜಲ ಹಾಗೂ ಶುದ್ಧ ಗಾಳಿಯನ್ನು ಕಾಪಾಡಿಕೊಳ್ಳುವ ಉದ್ದೇಶದಿಂದ ವೃದ್ಧರು, ಮಹಿಳೆಯರು ಹಾಗೂ ಯುವಕರು ಕೈಯಲ್ಲಿ ಸಸಿ ಹಿಡಿದು ನಡೆಸಿದ ಹೋರಾಟಕ್ಕೆ ಇದೀಗ ಫಲ ಸಿಕ್ಕಿದೆ.
ಹೋರಾಟದ ಗೆಲುವಿನ ಹಿನ್ನೆಲೆಯಲ್ಲಿ ಇಂದು ಶಿವಳ್ಳಿ ಗ್ರಾಮದ ನೂರಾರು ಗ್ರಾಮಸ್ಥರು ಒಂದೆಡೆ ಸೇರಿ ಗ್ರಾಮದೇವತೆಗೆ ವಿಶೇಷ ಪೂಜೆ ಸಲ್ಲಿಸಿ ಸಂಭ್ರಮಿಸಿದರು. ಬೆಳಗ್ಗೆಯಿಂದಲೇ ಗ್ರಾಮದೇವತೆ ದೇವಸ್ಥಾನದಲ್ಲಿ ಭಕ್ತರ ಸಂಭ್ರಮ ಮನೆ ಮಾಡಿತ್ತು. ತೆಂಗಿನಕಾಯಿ, ಹೂವು, ಹಣ್ಣುಗಳನ್ನು ಅರ್ಪಿಸಿ ದೇವಿಗೆ ವಿಶೇಷ ಪೂಜೆ ಸಲ್ಲಿಸಿದ ಗ್ರಾಮಸ್ಥರು, ಹರಕೆ ತೀರಿಸಿದರು.
“ನಮ್ಮ ತಾಯ್ನೆಲವನ್ನು ಕಾಪಾಡಿದ ಗ್ರಾಮದೇವತೆಗೆ ನಾವು ಚಿರಋಣಿಗಳು. ಅವಳ ಆಶೀರ್ವಾದದಿಂದಲೇ ಈ ಹೋರಾಟದಲ್ಲಿ ಗೆಲುವು ಸಾಧಿಸಲು ಸಾಧ್ಯವಾಯಿತು” ಎಂದು ಗ್ರಾಮಸ್ಥರು ಭಾವುಕರಾಗಿ ಹೇಳಿದರು. ಪೂಜೆಯ ಬಳಿಕ ಇಡೀ ಗ್ರಾಮದಲ್ಲಿ ಸಂಭ್ರಮದ ವಾತಾವರಣ ನಿರ್ಮಾಣವಾಗಿದ್ದು, ಪರಸ್ಪರ ಸಿಹಿ ಹಂಚಿಕೊಂಡು ಗೆಲುವನ್ನು ಆಚರಿಸಿದರು.
ಈ ಸಂದರ್ಭದಲ್ಲಿ ಗ್ರಾಮಸ್ಥರು News 88 ವಾಹಿನಿಗೆ ತುಂಬು ಹೃದಯದ ಧನ್ಯವಾದಗಳನ್ನು ಅರ್ಪಿಸಿದರು. “ಯಾರೂ ನಮ್ಮ ಕೂಗು ಕೇಳದಿದ್ದಾಗ, ಜಿಲ್ಲಾಡಳಿತ ಪೊಲೀಸ್ ಬಲದ ಮೂಲಕ ನಮ್ಮ ಹೋರಾಟವನ್ನು ಹತ್ತಿಕ್ಕಲು ಪ್ರಯತ್ನಿಸಿದ ಸಂದರ್ಭದಲ್ಲಿ ನಮ್ಮೊಂದಿಗೆ ನಿಂತಿದ್ದು News 88 ಮಾತ್ರ. ಮೊದಲ ದಿನದ ಪಾದಯಾತ್ರೆಯಿಂದ ಹಿಡಿದು ಗುಡ್ಡದವರೆಗಿನ ನಮ್ಮ ಪ್ರತಿಯೊಂದು ಹೆಜ್ಜೆಯನ್ನೂ ಜನರಿಗೆ ತಲುಪಿಸಿದ್ದು ನಿಮ್ಮ ವಾಹಿನಿ” ಎಂದು ಗ್ರಾಮಸ್ಥರು ಕೃತಜ್ಞತೆ ವ್ಯಕ್ತಪಡಿಸಿದರು.
“ನೀವು ನಮ್ಮ ಧ್ವನಿಯಾಗದಿದ್ದರೆ ನಮ್ಮ ಹೋರಾಟ ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಿರಲಿಲ್ಲ” ಎಂದು ಹಿರಿಯರೊಬ್ಬರು ಹೇಳಿದರು. ಮಹಿಳೆಯರೂ ಕೂಡ “ನಮ್ಮ ಮಕ್ಕಳ ಭವಿಷ್ಯಕ್ಕಾಗಿ ನಾವು ಹೋರಾಟ ನಡೆಸಿದ್ದೇವೆ. ನಮ್ಮ ಹೋರಾಟಕ್ಕೆ ಬೆಳಕು ಚೆಲ್ಲಿದ News 88 ವಾಹಿನಿಗೆ ಧನ್ಯವಾದಗಳು” ಎಂದು ಕೃತಜ್ಞತೆ ಸಲ್ಲಿಸಿದರು.
“ಜಿಲ್ಲಾಡಳಿತ ಎರಡು DAR ವಾಹನಗಳನ್ನು ತಂದು ತಡೆದರೂ, ತಹಶೀಲ್ದಾರ್ ಹಾಗೂ ಪಾಲಿಕೆ ಕಮಿಷನರ್ ಸ್ಥಳದಲ್ಲೇ ಬೀಡುಬಿಟ್ಟರೂ ನಾವು ಜಗ್ಗಲಿಲ್ಲ. ನಮ್ಮ ಕೈಯಲ್ಲಿದ್ದ ಸಸಿಯೇ ನಮ್ಮ ಅಸ್ತ್ರವಾಯಿತು. ಅದೇ ಇಂದು ನಮಗೆ ಗೆಲುವು ತಂದುಕೊಟ್ಟಿದೆ” ಎಂದು ಯುವಕರು ಸಂಭ್ರಮ ವ್ಯಕ್ತಪಡಿಸಿದರು.
ಒಟ್ಟಾರೆ, ಇದು ಕೇವಲ ಶಿವಳ್ಳಿ ಗ್ರಾಮದ ಗೆಲುವಲ್ಲ, ಪ್ರಕೃತಿ ಮತ್ತು ಪರಿಸರ ಸಂರಕ್ಷಣೆಗಾಗಿ ಹೋರಾಡುವ ಪ್ರತಿಯೊಬ್ಬರ ಗೆಲುವು ಎಂಬ ಅಭಿಪ್ರಾಯ ಗ್ರಾಮಸ್ಥರಿಂದ ವ್ಯಕ್ತವಾಯಿತು. ಜನರ ಒಗ್ಗಟ್ಟು, ನಿರಂತರ ಹೋರಾಟ ಹಾಗೂ ಮಾಧ್ಯಮದ ಬೆಂಬಲದಿಂದ ನ್ಯಾಯದ ಗೆಲುವು ಸಾಧ್ಯವಾಗಿದೆ ಎಂಬ ಸಂದೇಶವನ್ನು ಶಿವಳ್ಳಿ ಹೋರಾಟ ಸಾರಿದೆ.
