ಬೆಂಗಳೂರು: ಉದ್ಯೋಗಿಗಳಿಗೆ ಸಾಮಾನ್ಯವಾಗಿ ಕ್ಯಾಶುಯಲ್ ಲೀವ್, ಸಿಕ್ ಲೀವ್, ಎಮರ್ಜೆನ್ಸಿ ಲೀವ್, ಮೆಟರ್ನಿಟಿ ಹಾಗೂ ಪೆಟರ್ನಿಟಿ ಲೀವ್ ಸೇರಿದಂತೆ ಹಲವು ರೀತಿಯ ರಜೆಗಳು ಸಿಗುತ್ತವೆ. ಆದರೆ ಬೆಂಗಳೂರಿನ ಫಿನ್ಟೆಕ್ ಕಂಪನಿಯೊಂದು ತನ್ನ ಉದ್ಯೋಗಿಗಳ ವೈಯಕ್ತಿಕ ಬದುಕಿಗೂ ಮಹತ್ವ ನೀಡುವ ಮೂಲಕ ವಿಭಿನ್ನ ರಜೆ ನೀತಿಯನ್ನು ಜಾರಿಗೆ ತಂದಿದೆ.
ಹೌದು, ಸ್ಟಾಕ್ಗ್ರೋ ಕಂಪನಿಯಲ್ಲಿ ಉದ್ಯೋಗಿಗಳು ಬ್ರೇಕಪ್ ಅಥವಾ ವಿಚ್ಛೇದನದಂತಹ ವೈಯಕ್ತಿಕ ಸಮಸ್ಯೆ ಎದುರಿಸಿದಾಗ ‘ಬ್ರೇಕಪ್ ಲೀವ್’ ಪಡೆಯುವ ಅವಕಾಶವಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.
ಬ್ರೇಕಪ್ನಿಂದ ಉಂಟಾಗುವ ಭಾವನಾತ್ಮಕ ಒತ್ತಡದಿಂದ ಹೊರಬರಲು ಉದ್ಯೋಗಿಗಳಿಗೆ ಒಂದು ವಾರದವರೆಗೆ ರಜೆ ನೀಡಲಾಗುತ್ತದೆ ಎನ್ನಲಾಗಿದೆ. ವಿಶೇಷವೆಂದರೆ, ಈ ರಜೆ ಪಡೆಯಲು ಬ್ರೇಕಪ್ ಆಗಿದೆ ಎಂಬುದಕ್ಕೆ ಯಾವುದೇ ದಾಖಲೆ ಅಥವಾ ಪುರಾವೆ ನೀಡುವ ಅಗತ್ಯವಿಲ್ಲ. ಅಲ್ಲದೆ, ರಜೆ ಪಡೆದಿರುವ ಬಗ್ಗೆ ಕಂಪನಿ ಯಾವುದೇ ವಿಚಾರಣೆ ನಡೆಸುವುದಿಲ್ಲ ಎನ್ನಲಾಗಿದೆ.
2024ರ ಏಪ್ರಿಲ್ನಲ್ಲಿ ಈ ವಿಶೇಷ ರಜೆ ನೀತಿಯನ್ನು ಪರಿಚಯಿಸಲಾಗಿದ್ದು, ಉದ್ಯೋಗಿಗಳ ಕಷ್ಟದ ಸಮಯದಲ್ಲಿ ಸಂಸ್ಥೆಯೂ ಅವರ ಬೆಂಬಲಕ್ಕೆ ನಿಲ್ಲಬೇಕು ಎಂಬ ಉದ್ದೇಶದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ವರದಿಯಾಗಿದೆ.
ಉದ್ಯೋಗಿಗಳನ್ನು ಕೇವಲ ಸಿಬ್ಬಂದಿಯಾಗಿ ನೋಡದೆ ಕುಟುಂಬದ ಸದಸ್ಯರಂತೆ ಪರಿಗಣಿಸುವುದು ಹಾಗೂ ಅವರ ವೈಯಕ್ತಿಕ ಜೀವನದ ಸಂಕಷ್ಟದ ಸಂದರ್ಭದಲ್ಲೂ ಬೆಂಬಲ ನೀಡುವುದು ಈ ನೀತಿಯ ಉದ್ದೇಶ ಎನ್ನಲಾಗಿದೆ.
ಇದೀಗ ಸ್ಟಾಕ್ಗ್ರೋನ ಈ ವಿಭಿನ್ನ ‘ಬ್ರೇಕಪ್ ಲೀವ್’ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದ್ದು, ಉದ್ಯೋಗಿಗಳ ಮಾನಸಿಕ ನೆಮ್ಮದಿ ಹಾಗೂ ವೈಯಕ್ತಿಕ ಬದುಕಿಗೂ ಕಂಪನಿಗಳು ಮಹತ್ವ ನೀಡುತ್ತಿರುವುದಕ್ಕೆ ಇದು ಉದಾಹರಣೆಯಾಗಿದೆ.
