ನವದೆಹಲಿ: ಜನಪ್ರಿಯ ಮಸಾಲಾ ಬ್ರ್ಯಾಂಡ್ ಎವರೆಸ್ಟ್ಗೆ ಆಹಾರ ಸುರಕ್ಷತಾ ನಿಯಂತ್ರಕ FSSAI ಶಾಕ್ ನೀಡಿದೆ. ಗುಣಮಟ್ಟದ ಮಾನದಂಡಗಳನ್ನು ಪೂರೈಸದಿರುವುದು ಹಾಗೂ ಲೇಬಲ್ಗೆ ಸಂಬಂಧಿಸಿದ ನಿಯಮ ಉಲ್ಲಂಘನೆಗಳು ಪತ್ತೆಯಾದ ಹಿನ್ನೆಲೆಯಲ್ಲಿ ಎವರೆಸ್ಟ್ನ ಕಾಂಪೌಂಡೆಡ್ ಹಿಂಗ್ ಉತ್ಪನ್ನಗಳ ಮಾರಾಟಕ್ಕೆ ತಕ್ಷಣದಿಂದಲೇ ನಿರ್ಬಂಧ ವಿಧಿಸಲಾಗಿದೆ.
FSSAI ನಡೆಸಿದ ಪರೀಕ್ಷೆಯಲ್ಲಿ ಎವರೆಸ್ಟ್ನ ಹಿಂಗ್ ಮಾದರಿಗಳು ನಿಗದಿತ ಗುಣಮಟ್ಟಕ್ಕೆ ಹೊಂದಿಕೆಯಾಗಿಲ್ಲ ಎಂದು ತಿಳಿದುಬಂದಿದೆ. ಕಾಂಪೌಂಡೆಡ್ ಹಿಂಗ್ನಲ್ಲಿ ಕನಿಷ್ಠ 5% ಆಲ್ಕೋಹಾಲ್-ಸೊಲ್ಯೂಬಲ್ ಎಕ್ಸ್ಟ್ರಾಕ್ಟ್ ಇರಬೇಕಾದರೆ, ಪರೀಕ್ಷಿಸಿದ ಕೆಲವು ಮಾದರಿಗಳಲ್ಲಿ ಪ್ರಮಾಣ ಅದಕ್ಕಿಂತ ಕಡಿಮೆಯಾಗಿತ್ತು. ಒಂದು ಮಾದರಿಯಲ್ಲಿ ಈ ಪ್ರಮಾಣ ಶೂನ್ಯವಾಗಿತ್ತು ಎಂದು ವರದಿಯಾಗಿದೆ.
ಇದೇ ವೇಳೆ ಎವರೆಸ್ಟ್ನ ಚಿಕನ್ ಮಸಾಲಾ, ಗರಂ ಮಸಾಲಾ ಮತ್ತು ಎಗ್ ಕರಿ ಮಸಾಲಾ ಉತ್ಪನ್ನಗಳಲ್ಲೂ ಲೇಬಲ್ ಸಂಬಂಧಿತ ಕೆಲವು ನಿಯಮ ಉಲ್ಲಂಘನೆಗಳನ್ನು FSSAI ಗುರುತಿಸಿದೆ. ಆದರೆ ಈ ಮೂರು ಉತ್ಪನ್ನಗಳ ಮಾರಾಟಕ್ಕೆ ಇದೇ ಆದೇಶದಡಿ ನಿಷೇಧ ವಿಧಿಸಲಾಗಿಲ್ಲ. ಕಂಪನಿಗೆ ಉಲ್ಲಂಘನೆಗಳ ಕುರಿತು ವಿವರಣೆ ನೀಡುವಂತೆ ಹಾಗೂ ಮುಂದಿನ ದಿನಗಳಲ್ಲಿ ನಿಯಮ ಪಾಲನೆ ಖಚಿತಪಡಿಸುವ ಕ್ರಮಗಳ ವಿವರ ಸಲ್ಲಿಸುವಂತೆ ಸೂಚಿಸಲಾಗಿದೆ.
FSSAIಯ ಈ ಕ್ರಮದ ನಂತರ ಮಾರುಕಟ್ಟೆಯಲ್ಲಿರುವ ಸಂಬಂಧಿತ ಹಿಂಗ್ ಉತ್ಪನ್ನಗಳನ್ನು ಸ್ವಯಂಪ್ರೇರಿತವಾಗಿ ಹಿಂಪಡೆಯುವಂತೆ ಸೂಚಿಸಲಾಗಿದೆ. ಗಮನಿಸಬೇಕಾದದ್ದು, ಎವರೆಸ್ಟ್ನ ಎಲ್ಲಾ ಮಸಾಲೆಗಳಿಗೆ ಬ್ಯಾನ್ ಆಗಿಲ್ಲ; ಪ್ರಸ್ತುತ ನಿರ್ಬಂಧವು ಕಾಂಪೌಂಡೆಡ್ ಹಿಂಗ್ ಉತ್ಪನ್ನಗಳಿಗೆ ಮಾತ್ರ ಅನ್ವಯಿಸುತ್ತದೆ.
